10–13 mart 2026-cı il tarixində “YAŞAT” Fondunun təşkilatçılığı ilə Qəbələdə, “Tufandağ” Qış-Yay İstirahət Kompleksində şəhidlərimizin övladları üçün III qış düşərgəsi reallaşdırılıb.

Məqsəd iştirakçılar arasında qış mövsümünə uyğun idman növlərinə marağın artırılması, onların asudə vaxtlarının səmərəli təşkili, eləcə də yeni dostluq münasibətlərinin formalaşdırılması üçün şərait yaratmaqdır.

Düşərgədə Sumqayıt və Abşeron ərazilərində yaşayan 13–15 yaş aralığındakı şəhid övladları iştirak ediblər.

Proqram çərçivəsində iştirakçılar “Tufandağ” Qış-Yay İstirahət Kompleksində xizək təlimləri və dağ kosteri, dağ yelləncəyi kimi müxtəlif fəaliyyətlərdən istifadə edərək vaxtlarını səmərəli və maraqlı keçiriblər.

Bu barədə danışan Qrup Marketing Direktoru Rauf Cahangirov qeyd edib ki, “Yaşat Fondu ilə tərəfdaşlıq çərçivəsində ev sahibliyi etdiyimiz “Qış Düşərgəsi”nin bizim üçün xüsusi əhəmiyyəti var. Düşərgənin istirakçıları nurlu şəhidlərimizin əmanətləridir. Bu tərəfdaşlıq GHG-nin korporativ sosial məsuliyyət proqramı çərçivəsində baş tutur və Yaşat Fonduna bizə bu imkanı yaratdığı üçün təşəkkür edirik.”

Həmçinin iştirakçılar Yel çərşənbəsini tonqal ətrafında birlikdə qeyd ediblər.

Layihənin sponsoru “AMO Group”,  tərəfdaşı isə “Tufandağ” Qış-Yay İstirahət Kompleksidir.

Media tərəfdaş: ASAN TV/Radio